تاريخ التسجيل : 13/03/2010 مشاركات : 827 33 المهنه :
الجنس : مزاج العضــو :
نقاط : -2147472288
موضوع: حسنيه وجزها سى عبده الخميس 29 يوليو 2010, 2:22 am
الحلقة الأولى ( سنية أم منصور حبيبة القلب ) ======================
- ماتقومي يا بت يا حسنية نطلع ننام فوق السطوح .. فى الهوا فوق بدل الكاتمة بتاعة الطوب الأحمر دي - يا لهوي يا سي عبده .. عايزنا ننام فى الطّل والناس تشوفنا ؟؟ - ناس مين يا بنت اسماعين الأقرع .. ده أنا مسكنك فى الدار الوحيدة اللى فى عزبة أبو عميرة كلها دورين وم الطوب الأحمر كمان .. عمر جدك عبد الحفيظ الكلاف ما حلم بيها - ليه يا أخويا ؟؟ م جوز البت سنية أم منصور مسكنها فى دار دورين بردك وبالطوب الأحمر كمان - يحرق قديمك على قديم سنية أم منصور على قديم عيشتك الطين فى ساعة واحدة ودي دار دي يا بنت الرافضى عشان تساويها بدارنا ؟؟ ده أنا بنيهالك على قيراطين بحالهم يا بنت المخبولة - ديهيدي يا سي عبده .. م أنا برده بمشى رافعة راسى وسط النساوين يا أخويا وأمشى أتفشخر كده بيك وسطيهم وأقول جوزى وبعلى .. إلهى يخليك ليا يارب وميحرمنيش منك ابدااا - طب فذي قومى هاتى الحصيرة الجديدة والمسندين واطلعى افرشيهم فوق ، وأنا هجيب الجوزة وأحصلك وبعدين يبقى إنزلى جيبى التسجيل وشريط الست أم كلثوم اللى بتغنى فيه يا مسهرنى - يا لهوي يا لهوى يا لهوى .. وكمان يا مسهرنى يا سى عبده ؟؟ أنت مالك مش مظبوط ليه يا راجل بقالك يومين كده وليك طلبات غريبة - ده أنتى وليّه همّ .. يابت عايزين نعيش اليومين اللى حيلتنا فى الدنيا يابت حد ضامن بكره مخبيلنا إيه ؟؟ - مخبيلنا الهنا والسعد طول ما حسّك موجود فى الدنيا يا سي عبده - طب قومي يا أختى قومي .. إلهى تقوم قيامتك ونخلص
- آآآآآه ياست آآآآه .. ألف رحمة ونور تنزل عليكي .. عظمة والله عظمـــــة - كانت ست كُمل والله يا سي عبده ، ألا أنت صحيح حضرتلها حفلة قبل كده ؟؟؟ - أمال يا بت ، دي كان ليلة ليها العجب كانت ليلة ولا ألف ليلة ولا ليله - وغنت فيها يا مسهرنى يا سي عبده ؟؟ - غنت ( يا مسهرنى ) و ( هو صحيح الهوى غلاب ) بتاعة عم بيرم والشيخ زكريا أحمد .. كانت الحفلة كومبليت ليلتها وأنا كنت قاعد فى نص الصالة بس متطرف ع الجيهة الشمال كده وكان معايا الواد سيد أبو منصور أخو البت سنية .. وكانت ليلة فوللّى - كان صاحبك قوي الواد سيد ده ؟؟ - أه .. ألف رحمة ونور تنزل عليه .. كان صاحب صاحبه الواد ده وكان واد مجدع وراجل - كان فيه إشاعة كده يعنى يا سي عبده بتقول إنك كنت بتحب البت سنية أخته .. ألا الكلام ده بحق وحقيق؟؟ - جبتى الكلام ده منين يا بت ... أنطقى - الناس بتتكلم فى العزبة يا أخويا ومافيش حاجة بتستخبى - بيقولوا إيه الناس يا بنت المركوب ؟؟؟ - بيقولوا إنك كنت ميت فى دباديبها وهي أدتك بالصرمة على دماغك ورفضتك - صرمة مين يا بنت الصرمة .. ده أنا اللى مرضتش بيها لما عرفت إنها بتمشى مشى بطال والناس شافوها كذا مرة مع الواد على أبو إبراهيم ع الزراعية حدا الساقية القديمة - يعنى إتقدمتلها وطلبت إيدها زي ما بيقولوا ؟؟؟؟؟؟ - كان زمان وراح لحاله يابت .. إيه اللى بيخليكي تنعكشى فى الماضى بس مش تبوظيلنا الليلة الله يحرق سنينك - يعنى أنت بنيتلى الدار دي مش عشان خاطر سواد عيونى أنت بنيتها عشان تكيد حبيبة القلب وتفرسها وتعرف إنها لو كانت إتجوزتك كان زمانها عايشة فى نعيم زي ما الناس فاكرانى إنى عايشة فى نعيم معاك كده .. مش صح ؟؟ - عــــــــه ؟؟ - ودلوقتى مطلعنا السُطح ومشغلها الأغنية اللى بتحبها الست هانم عشان تسمعك وتتحسر على بختها الأسود يا بن لواحظ .. مش صح ؟؟ - لا مش صح يا بنت حفيظة وأتخمدي بقى وسيبينى أتخمد فى ليلتك اللى مش فايتة دي الناس صحيت على صوتك يا بنت الرافضى الله يخرب بيت أهلك - تتخمد ؟؟؟ .. والنبى م أنت مخمود إلا على سرير الإسبتاليا الليلة
( رفعت حسنية زجاجة المياه ونزلت بها على رأس سي عبده ) __________________
موضوع: حسنيه وجزها سى عبده 
الخميس 29 يوليو 2010, 2:22 am
